Timburmaður (Húsasmiður)

Ein timburmaður fæst við at byggja sethús og virkisbygningar og onnur byggiarbeiði.

Arbeiðið fevnir m.a. um gólv, útveggir, takverk og at seta upp formar. Timburmaðurin arbeiðir eisini við at bjálva, klæða, seta vindeygu og hurðar í umframt at seta køkseindir og aðrar lidnar bygningslutir upp.

Um útbúgvingina

Tú lærir ráðlegging, at loysa seruppgávur, um nýhugsan og at finna loysnir. Eisini lærir tú at ráðgeva og um kundatænastu. Á skúlanum lærir tú eisini um umhvørvi og trygd á arbeiðs­plássinum og hjá kundanum.

Skipan av útbúgvingini

Allar yrkisútbúgvingar eru skipaðar soleiðis, at skift verður millum verkliga læru á góðkendum læruplássi og skúlagongd á yrkisskúla.

Tú hevur hesar lærugreinarnar: 

1. Amboðslæra
2. Arbeiðsumhvørvi
3. Betong og forskalling
4. Byggipláss
5. Eldsløkking
6. Fyrstahjálp
7. Góðskutilvitan
8. Hæddarmáta og avseta
9. Ísetan av hurðum og vindeygum
10. Konstruktiónir
11. Snið, skap og litir
12. Tekning
13. Tilfarslæra
14. Trappur, rimaverk og svalar

Skúlagongdin, íroknað eitt sveinaroyndarskeið, er 55 vikur og verður skipað soleiðis:

• 1. skúlaskeið, 2. skúlaskeið og 3. skúlaskeið 50 vikur tilsamans, og
• sveinaroyndarskeið, 5 vikur 

Útbúgvingin endar við sveinaroynd.

Førleikarnir, sum tú hevur fingið eftir lokna útbúgving sum timburmaður eru, at:

1. hallmáta og hæddarmáta øki, áseta kotur og vatnrættar og loddrættar linjur og velja mátitól,
2. innrætta eitt byggipláss við atliti at arbeiðsumhvørvi, trygd, gonguvegum, ruskskiljing, veðurviðurskiftum og trivnaðarhentleikum,
3. luttaka í fyribyrgjandi trygdararbeiði og í fyriskipanini av hesum á arbeiðsplássinum,
4. lesa vegleiðingar og trygdarvegleiðingar,
5. gera mongdarútrokningar av tilfari,
6. gera hondtekningar og skitsur,
7. samskifta við viðskiftafólk,
8. meta um dimensiónir, tilfar, amboð og trygdarútgerð,
9. leggja út undirsløg,
10. evna til og byggja upp útvegg við klædningi, seta upp klædning á skjøldur og evna til vindskeiðir, úthang og takskegg,
11. snøra upp, avbinda, evna til, byggja upp yvirtrom,
12. leggja ymisk sløg av tróðri,
13. vksla út, seta takvindeygu í og arbeiða við inndekningum til ymisk taksnið,
14. evna til og leggja skottrennu,
15. lekta eina yvirtrom til ávís tøk,
16. evna til takverk við takskeggi og skálkum,
17. seta í innhurðar og úthurðar og vindeygu við tilsetningum, inndekningum og fugum,
18. byggja upp og klæða innanveggir,
19. byggja upp gólv og veggir í einum vátrúmi,
20. leggja trægólv við parket ella brettum og øðrum líknandi tilfari,
21. seta upp loft og undirlag til loft,
22. seta upp fast innbúgv,
23. vísa ávísan kunnleika til at seta upp trappur, og
24. umvæla rotskaðar og soppaskaðar.

Harafturat fært tú kunnleika til siðbundna føroyska byggilist, so sum flagtekja og triðingsreising. Eisini ymisk sløg av betongi og innlit í kloak- og rørviðurskifti.

Upptøkutreytir

Fráfaringarroynd fólkaskúlans.

Framhaldandi útbúgving

Tú kanst fara undir fleiri ymiskar framhaldsútbúgvingar  t.d. byggifrøði, verkfrøði og arkitektur. Nakrar framhaldsútbúgvingar hava upptøkukrøv, sum tú ikki lýkur. Tú manglar møguliga lærugreinar ella støði, sum tú kanst taka t.d. við at taka ískoytisútbúgving.

Kanna eftir framhaldandi útbúgvingar møguleikar og krøv her.

Starvsmøguleikar

Eftir lokna útbúgving kanst tú arbeiða sum góðkendur timburmaður.

Tey flestu fáa starv í smærri- og miðlastórum byggifyritøkum ella velja at stovna egna fyritøku. Tú kanst vænta at hava skiftandi starvstøð til einstakar uppgávur og at skifta starv til tíðir.

Meiri kunning

"Ofta Settir Spurningar" um yrkisútbúgvingar eru her.
Yrkisdepilin
Glasir
Tekniski skúlin í Klaksvík